குஜராத் மாடல்: மக்களை ஏமாற்றிய மோடி அரசு-சுதிர்

இந்திய அரசியலில் ‘குஜராத் மாடல்’ என்பது ஒரு மிகப்பெரிய வளர்ச்சி பிம்பமாக கட்டமைக்கப்பட்டது. ஆனால், அந்த பிம்பத்தின் பின்னால் மறைந்திருக்கும் மிகப்பெரிய நிதி மோசடிகளில் ஒன்றுதான் ஜி.எஸ்.பி.சி (Gujarat State Petroleum Corporation) விவகாரம்.

2005 ஆம் ஆண்டு அப்போதைய குஜராத் முதல்வர் நரேந்திர மோடி விடுத்த ஒரு அறிவிப்பு, இந்தியாவையே உற்று நோக்க வைத்தது.

கிருஷ்ணா-கோதாவரி (KG) படுகையில் 20 டிரில்லியன் கன அடி இயற்கை எரிவாயு கண்டுபிடிக்கப்பட்டு உள்ளதாகவும், அதன் மதிப்பு ரூ 2 லட்சம் கோடி என்றும் அவர் முழங்கினார்.குஜராத் ஒரு “எரிசக்தி வல்லரசாக” மாறும் என்றும், அரபு நாடுகளைப் போல குஜராத் விவசாயிகள் செழிப்படைவார்கள் என்றும் கனவு விற்கப்பட்டது.

ஆனால், ஆண்டுகள் உருண்டோடினாலும் ஒரு சொட்டு எரிவாயு கூட வணிக ரீதியாக எடுக்கப்படவில்லை. உண்மை என்னவென்றால், அந்தப் பகுதியில் எரிவாயு எடுப்பது தொழில்நுட்ப ரீதியாக கடினமானது மற்றும் அதிக செலவு பிடிக்கக் கூடியது.

இந்தத் திட்டத்திற்காக பொதுத்துறை வங்கிகளிடம் இருந்து சுமார் ரூ 20,000 கோடிக்கு மேல் கடன் வாங்கப்பட்டது. எரிவாயு உற்பத்தி பூஜ்ஜியமாக இருந்த நிலையில், வட்டி மட்டுமே பல ஆயிரம் கோடிகளாகக் குவிந்தது.இது குறித்து சிஏஜி (CAG) தாக்கல் செய்த அறிக்கையில், நிர்வாகச் சீர்கேடு மற்றும் தேவையற்ற செலவினங்களால் அரசுக்கு மிகப்பெரிய இழப்பு ஏற்பட்டதாகச் சுட்டிக்காட்டப்பட்டது.

இந்த ஊழலின் மற்றொரு முக்கிய அம்சம் தனியார் நிறுவனங்களுக்கு அளிக்கப்பட்ட சலுகை. ஜி.எஸ்.பி.சி நிறுவனம் வெளிச்சந்தையில் அதிக விலைக்கு எரிவாயுவை வாங்கி, அதனை அதானி எனர்ஜி (Adani Energy) போன்ற நிறுவனங்களுக்கு மிகக்குறைந்த விலைக்கு விற்பனை செய்தது.

2012 ஆம் ஆண்டு சிஏஜி அறிக்கையின் படி, அதானி நிறுவனத்திற்கு மட்டும் சுமார் ரூ 70.54 கோடி அளவுக்கு லாபம் கிடைத்துள்ளது. பொது மக்களின் வரிப் பணத்தில் இயங்கும் ஒரு அரசு நிறுவனம் நஷ்டத்தைச் சந்தித்துவிட்டு, ஒரு தனியார் முதலாளிக்கு லாபத்தை வாரி வழங்கியது மிகப்பெரிய துரோகமாகும்.

2017 ஆம் ஆண்டு நரேந்திர மோடி பிரதமராக இருந்தபோது, திவாலாகும் நிலையில் இருந்த ஜி.எஸ்.பி.சி-யைக் காப்பாற்ற ஒரு தந்திரம் கையாளப்பட்டது.மத்திய பொதுத்துறை நிறுவனமான ஓ.என்.ஜி.சி (ONGC), ஜி.எஸ்.பி.சி-யின் 80% பங்குகளை ரூ 8,000 கோடிக்கு வாங்கியது. லாபத்தில் இயங்கிக் கொண்டிருந்த ஓ.என்.ஜி.சி-யின் தலையில் இந்த நஷ்டமடைந்த நிறுவனத்தைக் கட்டி, குஜராத் அரசின் கடனை மத்திய அரசு ஏப்பம் விட்டது.இது நேரடியாக இந்திய மக்களின் வரிப் பணத்தை வைத்து செய்யப்பட்ட ஒரு மோசமான நடவடிக்கை (Bailout) ஆகும்.

2005 இல் தொடங்கிய இந்த “எரிவாயு புரட்சி” என்ற நாடகம், 2017 இல் பொதுத்துறை நிறுவனமான ஓ.என்.ஜி.சி-யை பலிகடா ஆக்கியதோடு முடிவுக்கு வந்தது.அன்று முதல் இன்று வரை வெற்று வாக்குறுதிகளைக் கொடுத்து இந்திய மக்களை ஏமாற்றும் படலம் தொடர்ந்து கொண்டே இருக்கிறது.விளம்பர அரசியலால் உண்மைகளை மறைக்கலாம், ஆனால் புள்ளிவிவரங்கள் பொய் சொல்வதில்லை.

மோடி அரசு வீழ்வதும், மோடி அரசை ஆட்டுவிக்கும் ஆர்எஸ்எஸ் அம்பலப்பட்டு இந்தியாவிலிருந்து முற்றிலும் அகற்றப்படும் என்பது நிச்சயம்…

-சுதிர்