கியூபாவும் கருக்கலைப்பு உரிமையும்! – சுதிர்

உலக வரைபடத்தில் ஒரு சிறிய தீவு நாடாக இருந்தாலும், மனித உரிமைகள் மற்றும் பொதுச் சுகாதாரக் கட்டமைப்பில் கியூபா ஒரு மாபெரும் சக்தியாகத் திகழ்கிறது.

குறிப்பாக, ‘இனப்பெருக்க நீதி’ (Reproductive Justice) என்பது வெறும் ஏட்டளவிலான சொல்லாக இல்லாமல், ஒரு நாட்டின் குடிமக்களின் அடிப்படை உரிமையாக எப்படிச் செயல்பட வேண்டும் என்பதை கியூபா உலகிற்கு நிரூபித்துக் காட்டியுள்ளது.

1959 ஆம் ஆண்டு புரட்சிக்குப் பிறகு, லாபத்தை மட்டுமே நோக்கமாகக் கொள்ளாமல் மனிதர்களை மையமாகக் கொண்ட ஒரு மருத்துவக் கட்டமைப்பை கியூபா உருவாக்கியுள்ளது.

இனப்பெருக்க நீதி

இனப்பெருக்க நீதி என்பது கருக்கலைப்பு அல்லது குடும்பக் கட்டுப்பாடு தொடர்பான “தேர்வு” (Choice) சார்ந்தது. அதுமட்டுமல்ல இது அதற்கும் மேலான மூன்று அடிப்படை உரிமைகளையும் உள்ளடக்கியுள்ளது.

1. ஒரு பெண் தான் விரும்பும் போது குழந்தை பெற்றுக் கொள்ளும் உரிமை.

2. குழந்தை வேண்டாம் என்று முடிவெடுக்கும் உரிமை.

3. பாதுகாப்பான மற்றும் ஆரோக்கியமான சூழலில் தனது குடும்பத்தை வளர்க்கும் உரிமை.

கியூபாவின் அரசியலமைப்பு, மருத்துவச் சேவையை ஒரு வணிகமாகப் பார்க்காமல், அது ஒவ்வொரு குடிமகனுக்கும் கிடைக்க வேண்டிய அடிப்படை மனித உரிமை என வரையறுக்கிறது. இதன் காரணமாகவே, அங்கு வர்க்கப் பாகுபாடின்றி அனைவருக்கும் இலவச மற்றும் உயர்தர சிகிச்சை வழங்கப்படுகிறது.

மகப்பேறு இல்லங்கள் கியூபாவின் தனித்துவ கண்டுபிடிப்பு

கியூபாவின் சுகாதாரக் கட்டமைப்பில் மிக முக்கியமான அம்சம் ‘மகப்பேறு இல்லங்கள்’ (Hogares Maternos) ஆகும். கிராமப்புறங்களில் வசிக்கும் பெண்கள் மற்றும் சிக்கலான கர்ப்பத்தைக் கொண்ட பெண்களுக்குச் சிறந்த சிகிச்சை அளிப்பதற்காக இவை உருவாக்கப்பட்டன.

தற்போது கியூபா முழுவதும் 300க்கும் மேற்பட்ட மகப்பேறு இல்லங்கள் உள்ளன. இங்கு தங்கியிருக்கும் கர்ப்பிணிகளுக்கு:

• 24 மணிநேர மருத்துவக் கண்காணிப்பு.
• சரிவிகித ஊட்டச்சத்துணவு.
• பிரசவ காலத்திற்கான சிறப்புப் பயிற்சிகள் மற்றும் ஆலோசனைகள் வழங்கப்படுகின்றன.

புரட்சிக்கு முன்னதாக இருந்த இன மற்றும் பொருளாதார ரீதியான சுகாதார ஏற்றத்தாழ்வுகளைக் களைவதில் இந்த இல்லங்கள் முக்கியப் பங்காற்றின. இதன் விளைவாகவே, கியூபாவின் குழந்தை இறப்பு விகிதம் பல வளர்ந்த நாடுகளை விடக் குறைவாக உள்ளது.

கருக்கலைப்பு மற்றும் பாலியல் ஆரோக்கியம்

லத்தீன் அமெரிக்க நாடுகளிலேயே கருக்கலைப்பை முதன்முதலில் (1965 இல்) சட்டப்பூர்வமாக்கிய நாடு கியூபா தான். அங்கு கருக்கலைப்பு என்பது ஒரு சமூகக் களங்கமாகவோ அல்லது குற்றமாகவோ பார்க்கப்படுவதில்லை. மாறாக, அது பொதுச் சுகாதாரத்தின் ஒரு சாதாரணப் பகுதியாகக் கருதப்படுகிறது. அரசு மருத்துவமனைகளில் எவ்வித நிபந்தனையுமின்றி, பாதுகாப்பான முறையில் இலவசமாக இச்சேவை வழங்கப்படுகிறது.

அதேபோல், பாலியல் ஆரோக்கியத்திலும் கியூபா உலக சாதனை படைத்துள்ளது. 2015 ஆம் ஆண்டில், எய்ட்ஸ் (HIV) மற்றும் சிபிலிஸ் நோய்கள் தாயிடமிருந்து குழந்தைக்குப் பரவுவதை முற்றிலுமாகத் தடுத்த உலகின் முதல் நாடு என்ற அங்கீகாரத்தை உலக சுகாதார நிறுவனத்திடம் (WHO) இருந்து கியூபா பெற்றது. இது முறையான கல்வி மற்றும் தொடர் மருத்துவப் பரிசோதனைகளால் சாத்தியமானது.

உடல் சார் தன்னுரிமை மற்றும் பாலின உறுதி சிகிச்சை

மனித உரிமைகளில் கியூபாவின் அக்கறை பாலினச் சிறுபான்மையினரிடமும் நீடிக்கிறது. 2008 ஆம் ஆண்டு முதல், பாலின மாற்று அறுவை சிகிச்சைகள் மற்றும் பாலின உறுதி சிகிச்சைகளுக்கான (Gender Affirming Care) முழுச் செலவையும் அரசே ஏற்று வருகிறது. உடல் சார் தன்னுரிமை (Bodily Autonomy) என்பது தனிமனித உரிமை என்பதை கியூபா இதன் மூலம் உறுதிப்படுத்துகிறது.

அமெரிக்கப் பொருளாதார முற்றுகையும் அதன் பாதிப்புகளும்

இத்தனை சாதனைகளைச் செய்த கியூபாவின் சுகாதாரக் கட்டமைப்பு, தற்போது அமெரிக்காவின் கடுமையான பொருளாதார முற்றுகையினால் (Embargo) பெரும் அச்சுறுத்தலுக்கு உள்ளாகியுள்ளது. பல தசாப்தங்களாகத் தொடரும் இந்தத் தடை, கியூபாவின் மருந்து மற்றும் மருத்துவக் கருவிகளின் இறக்குமதியைப் பாதிக்கிறது.

மருத்துவத் தட்டுப்பாடு: புற்றுநோய் மருந்துகள், மயக்க மருந்துகள் மற்றும் நவீன அறுவை சிகிச்சை கருவிகள் கிடைப்பதில் பெரும் சிரமம் ஏற்பட்டுள்ளது.

மகப்பேறு ஆபத்து: தற்போதைய பொருளாதார நெருக்கடியால் சுமார் 32,000 கர்ப்பிணிப் பெண்கள் போதிய மருத்துவ வசதியின்றி ஆபத்தில் இருப்பதாகத் தரவுகள் கூறுகின்றன. இந்தச் சூழல், போரினால் பாதிக்கப்பட்ட காஸா போன்ற பகுதிகளின் நெருக்கடியோடு ஒப்பிடப்படுகிறது.

புலம்பெயர்வு: அடிப்படை சிகிச்சை மற்றும் மருந்துகள் கிடைக்காத காரணத்தால், திறமையான மருத்துவர்களும் மக்களும் வேறு நாடுகளுக்குப் புலம்பெயர வேண்டிய கட்டாயத்திற்குத் தள்ளப்படுகிறார்கள்.

அமெரிக்கா கியூபாவை ‘பயங்கரவாதத்தை ஆதரிக்கும் நாடுகள்’ (SSOT) பட்டியலில் சேர்த்திருப்பது, அந்நாட்டிற்கு வரும் சர்வதேச நிதியுதவிகளையும் வர்த்தகத்தையும் முடக்கியுள்ளது. இது லாபத்தை விட மனித உயிர்களுக்கு முன்னுரிமை அளித்த ஒரு மக்கள் கூட்டத்திற்குத் தரப்படும் “கூட்டுத் தண்டனை” (Collective Punishment) ஆகும்.

உலகளாவிய மனிதாபிமானம்

தன் நாடு இவ்வளவு நெருக்கடியில் இருந்தபோதும், கியூபா தனது மனிதாபிமானத்தை விட்டுக் கொடுக்கவில்லை. உலகின் பல ஏழை நாடுகளுக்கு ஆயிரக்கணக்கான மருத்துவர்களை அனுப்பி வைப்பதிலும், அங்குள்ள மாணவர்களுக்கு இலவச மருத்துவக் கல்வி வழங்குவதிலும் கியூபா முன்னணியில் உள்ளது.

‘ஹென்றி ரீவ் பிரிகேட்’ (Henry Reeve Brigade) போன்ற கியூபாவின் மருத்துவக் குழுக்கள் பேரிடர் காலங்களில் உலகம் முழுவதும் ஆற்றிய சேவை ஈடு இணையற்றது.

முடிவாக… நமது கடமை

இனப்பெருக்க நீதி மற்றும் உலகளாவிய சுகாதாரத்தில் கியூபா ஒரு கலங்கரை விளக்கமாகத் திகழ்கிறது. அந்த விளக்கைத் அணைக்க முயலும் பொருளாதாரத் தடைகளை உலகம் ஒன்றிணைந்து எதிர்க்க வேண்டும்.

1. கியூபாவை ‘பயங்கரவாதப் பட்டியலிலிருந்து’ நீக்க வேண்டும்.

2. பொருளாதார முற்றுகையை உடனடியாக ரத்து செய்ய வேண்டும்.

3. கியூபாவின் இறையாண்மையை மதிக்க வேண்டும்.

இவை வெறும் அரசியல் கோரிக்கைகள் அல்ல, அவை மில்லியன் கணக்கான மக்களின் உயிர்வாழும் உரிமைக்கான குரல்.

மனிதநேயத்தையும் சமூக நீதியையும் போற்றும் ஒவ்வொருவரும் கியூபாவின் பக்கம் நிற்க வேண்டியது காலத்தின் கட்டாயம்.

-சுதிர்